Əməliyyat kodları (T-Code)

Salamlar. Bu gün paylaşdığımız yazıda EWM-də əməliyyat kodları (transaction code və ya t-code), onların açıqlaması və ən çox istifadə olunanlar haqda danışacağıq.

Əməliyyat kodu nədir?

Əməliyyat kodu SAP-də ekranlara daxil olmaq üçün bir neçə menyudan istifadə etməyəsən deyə işlədilir. Yəni, bir pəncərəyə daxil olmaq üçün bir neçə menyu və ya alt menyulardan istifadə olunacaqdısa, əməliyyat kodu hissəsinə yazılan kodlara uyğun olaraq tək addımda həmin ekrana daxil olunur.

Digər modullardan fərqli olaraq EWM-də əməliyyat kodları bir başa hərf ilə başlamır. Əməliyyat kodunu yazmadan öncə qabağında /n (mövcud ekranda yeni ekranı aç) və ya /o (mövcud ekranı saxlamaqla yeni ekran aç) istifadə olunmalıdır. SAP EWM-də əməliyyat kodlarının demək olar ki, hamısı SCWM (Supply Chain Warehouse Management) ilə başlayır. Yeni yazılan ekran və ya proqramlar isə adətən ZEWM ilə başlayır.

EWM-də əməliyyat kodlarının sayı təqribi olaraq 400-ə yaxındır. Bunların hamısını bilmək və istifadə etmək çox uzun zaman və təcrübə tələb etdiyi üçün aşağıda ən çox istifadə olunanlardan bir neçəsini paylaşdıq.